Anchi Mad-an ya hen anchi Fafuy

                          Anchi Mad-an ya hen anchi Fafuy
                                        (William Pokleng)
     Hen-argawan ano, cha managhagad hen éhay mad-an ah chu-urun hen faréyna.  Yachi man ano way cha managhagad, inchahana hen ihay pelak.  Ekatna anoh hamhamànéén, ‘Heno kay ngatan menlàwà an natto?’ Hemhemmàna ano way
Mangaliyén, unuyna no fafuy hen menlàwà ta chumakar.
    Yachi ano way nalpas way nanagad, émméy ah tencha-an way lomao ah fafuy.  Yachi ano way lommao tot-owa, ginelengana yag homàyat komah fabréy.  
    Yachi ano way inumchah hen agginawan hen charan, wachaat ano agé hen anchi arad.  Ekatna anon chi fafuyén, ‘Pagto-om éggay antoy arad te achiyà maka-okwat an hea.’  Achi ano pomagtò anchi fafuy.
    Entaédna ano anchi fafuy hen anchi arad yag lommayaw.  Iggay mahen-awniyan ano yag hinib-atna hen ihay aho.  Ekatna ano hen anchi ahowén, ‘Umalea ta im fangtén anchi fafuy-o te annag achi pagto-on anchi arad wat madhémanà way homàyat fabréy.’  Achi ano changrén anchi aho yag chaat ano mamfénafénag.
    Yachi ano way nànàéy anchi mad-an, inidhana ano hen lunu. Ekatna ano agéén, ‘Umalea ta im hapratan anchi aho te annag achi fangtén anchi fafuy-o, way anchi fafuy-o achi pomagtò iggaw arad wat madhémanà way homàyat ah fabréy.’  Ngém anchi ano agé lunu, ammag achi maokwat way manaprat anchi aho.  
    Angkay nànàéy anchi mad-an, innilana hen apoy.  Ekatna ano agéén, ‘ Pangnga-asem paat éggay way apoy ta im gabhén anchi lunu, te annag achi hapratan anchi aho, wat anchi aho, achina fangtén anchi fafuy-o, yag anchi fafuy-o achina pagto-on anchi arachat madhémanà way homàyat ah fabréy.’   Ngém anchi apoy, achina agé laychén.
    Yachi ano agé way cha émé-éméy, inchahana ano agé hen anchi wangwang.  Ekatna ano agéén, ‘Pangpanga-asem  éggay paat way wangwang ta im pédtén anchi apoy te annag achi gabhén anchi lunu way anchi lunu annag achi hapratan anchi aho way anchi aho, achina fangtén anchi fafuy-o way anchi fafuy achina pagto-on anchi arad wat madhémanà way homàyat ah fabréy.’  Ngém anchi wangwang achina ano agé laychén.
    Yachi ano agé way cha émé-éméy, innilana anoh faka.  Ekatna anowén, ‘Pangpangnga-asem paat éggay  way faka ta inumum anchi wangwang te annag achi pédtén anchi apoy way anchi apoy achina gabhén anchi lunu way anchi lunu achina hapratan anchi aho way anchi aho achina fangtén anchi fafuy-o way anchi fafuy achina pagto-on anchi arad wat madhémanà way homàyat ah fabréy.’ Ngém anchi faka achina agé laychén.
    Yachi ano way cha émé-éméy, hinib-atna hen ihay am-ama.  Ekatna ano agéén, ‘Pangpangnga-asem paat éggay ta chégchégém anchi faka te annag achi inumun anchi wangwang way anchi wangwang annag achi pédtén anchi apoy way anchi apoy annag achi gabhén anchi lunu way anchi lunu annag achi hapratan anchi aho way anchi aho achina fangtén anchi fafuy-o way anchi fafuy annag achi pagto-on anchi arad wat madhémanà way homàyat ah fabréy.’  Ngém mag achi agé anchi tatagu.
    Yachi ano agé way cha émé-éméy, inchahana hen lufid.  ‘Ekatna ano agéén, ‘Pangpangnga-asem éggay paat way lufid ta ehabrotno hen anchi am-ama te achina chégchégén anchi faka way anchi faka annag achi inumun anchi wangwang way anchi wangwang annag achi pédtén anchi apoy way anchi apoy annag achi gabhén anchi lunu way anchi lunu annag achi hapratan anchi aho way anchi aho achina fangtén anchi fafuy-o way anchi fafuy annag achi pagto-on anchi arad wat madhémanà way homàyat ah fabréy.’  Ngém ammag achi agé anchi lufid.
    Yachi ano, cha émé-émé yag inchahana hen utot.  Ekatna ano agéén, ‘Pangpangnga-asem éggay paat way uto ta hétaém anchi lufid te annag achi ehabrot anchi am-ama way anchi am-ama achina chégchégén anchi faka way anchi faka annag achi inumun anchi wangwang way anchi wangwang annag achi pédtén anchi apoy way anchi apoy annag achi gabhén anchi lunu way anchi lunu annag achi hapratan anchi aho way anchi aho achina fangtén anchi fafuy-o way anchi fafuy annag achi pagto-on anchi arad wat madhémanà way homàyat ah fabréy.’  Ngém achi agé anchi utot.
    Yachi ano way cha émé-éméy anchi mad-an, inchahana ano ah kosa.  Ekatna anowén, ‘Pangpangnga-asem éggay paat way kosa ta chupapém anchi utot te annag achi hétaén anchi lufid way anchi lufid annag achi ehabrot anchi am-ama way anchi am-ama achina chégchégén anchi faka way anchi faka annag achi inumun anchi wangwang way anchi wangwang annag achi pédtén anchi apoy way anchi apoy annag achi gabhén anchi lunu way anchi lunu annag achi hapratan anchi aho way anchi aho achina fangtén anchi fafuy-o way anchi fafuy annag achi pagto-on anchi arad wat madhémanà way homàyat ah fabréy.’  ‘Chupapê ngarud ngém adchanà ah anê’ way ekat ano kosa.  Yag ummara ano tot-owa anchi mad-an ah fégah yag nansor-at yag penanganna anchi kosa.
    Wat enlapon anchi kosa way mampap anchi utot, yag enlapon anchi utot way manétà anchi lufid yag enlapon anchi lufid way mangenhabrot anchi am-ama yag enlapon anchi am-ama way manégchég anchi anchi faka yag enlapon anchi faka way manginum anchi wangwang yag enlapon anchi wangwang way mamchi anchi apoy yag enlapon anchi apoy way manghéb anchi lunu, yag enlapon anchi lunu way manaprat anchi aho yag enlapon anchi aho way mamngat anchi fafuy yag penagtò anchi fafuy hen anchi arad wat cha-an madhéman anchi mad-an way hommàyat ah fabréyna.
Anggaychi!
 

Send us your comments or questions