Ah Agginsod
(Gloria Baguingan)
Ané anoh Agginsod. Sood, sood, Agginsod ay wachay chinémchémno, Tonak? Ane, maichat agé te ennan utteng-o way Marites ad anad. Nakanangkang ano hen hayuganna way entap-ar Agginsod ad lagud! Matéy way Agginsod, yag chinégchég Magranga yag neppégchad Lanah yag nafangad te ammag fiah ah Agginsod, kaman fiah chi ugha.
Émméy anoh Agginsod ad lagud ah faréy cha Abbakan. Ekatna anowén, Sood, sood, Agginsod wachay chinémchémno, Aggaw? Hometang an naha, Agginsod. Maid chinémchém te ennan anào way Markos ad anad. Hénggép-a kagé ta anto lawa hen chan umis way henlag, ekat Abbakan way ahawan Aggaw. Hinénggép ano ah Agginsod yag mag cha mangamangan ingganah nan-agginaw-éna hen henhangfaw yag nadchangay! Intùchuna way mag cha umutauta ingganah nagichah.
Matéyat way Agginsod, henowat hen pasag ah hopom. Naka-an ano hen chinangayna yag ekatna anowén, ‘Éméyà tot-owa te annay nanggawa ta umchahà ad Pekkepekke way fabréy-o.
Nafigat ano yag émméy ah Agginsod ad Tenaro.
Fummùnag ano ah fùnagan Walet. Ekat ano Waletén, ‘Nokay ayam, Agginsod? Émeyà umpay man-anap ah chinémchém Ligaya way ahawam. ‘Sood, sood Agginsod ay wachay chinémchémno, Ligaya?’ ‘Heno ay hen cham i ana-anapén ah finigat, Agginsod? Maid te ennan Lakyat ad anad. Tàén kagé yag hinénggép-a ta mauto antoy finniyà ad ugga yag nangantaaw.’ ‘Oo, ayong, nog wacha peet finniyam.’ Nangancha ano yag nabhug ah Agginsod wat mag chan uwauwab way kaman chalet.
Teg-angay ano fumtà hen potona ah finhugna. ‘Henowat ay hen pasagha ah okrongno ta mag nabhugta yag achita magipoh.’ Ay i nan-em-em paat ah Agginsod? Ammag kaman sakar way ammag naleletag.
Angkay ommargaw ano yag émméy ah faréy cha Bagsao. Ekatna anowén, ‘Sood, sood Agginsod wachay chinémchémno, Bagsao?’ ‘Maid, te maid témménéngni wat iggay nanchamcham ah Lumay way ahawà. Hénggép-a kagé ta anto hen fayah way saganan hen lafot-o ad uwan.’ Hinénggép anoh Agginsod yag ininumna hen kagudwan chi lata way fayah. Nafutang ano ah Agginsod yag narangad way nasséy. Anchi cha malihnug ah init yag ekat ano Bagsaoén, ‘Ayé kay ta fu-uchuntaaw ah Agginsod ta éyéytaaw ad Pekkepekke te ay ammoh achi anapén ahawana?’ Finu-udcha ano hiya wat inyéycha. Ay wachay ginìnan Agginsod hen namu-uchancha? Maid ano te ammag Futog yanggay way chan agéagékar hen ninligwatancha.
Angkay ano inumchahcha ad Torchagan, mag kaman chullug way napanetag yag fangofangon ano yag imfudchùnaat way managtag. Maid ano innilacha ah nalemohana te ay nat-én anoy hiwà way émméy.
‘Epegpegwamha, Agginsod, way manloko an chàni. Yasa ta wachay kasen yag antaaw mag cha il-ilan ah Agginsochanna. Telételégcha anochi yag no wachay mafutangan Agginsod, anchag cha il-ilan hiya.
Wat yahay ungunga, no wachay anén, temparéén te inéngngén ah Agginsod. Ammag aggafiin hen chana am-ammaan gapon okrongna ah ma-an ancha missa.
