Hen Laprapon hen Mangissaan hen SeIay hen Aggama
(Thomas Charchar)
Ad namenghan ano wacha hen anchi chuway animal way ammag kaman hen-agi. Hen ngachanchaat cha Selay an Aggama.
Hen-argawan ano ekat Selay an Aggaméén, ‘Inta umarah manò. Ekat ano Aggaméén, ‘Okaỳ.’ Laylayad anoh Selay wat kaman paat ano hen anchi tatagu way nangchah ah ammayay inchahana. Ekat ano Selayén, ‘Intad Pengaw ta chanakkal ya tommafacha hen anchichay manò cha Gumiyaw.’ Ekat ano Aggaméén, ‘Okaỳ.’ Angkay yachi ano way inumchahcha hen anchi fùnagan hen ePengaw, ekat ano Selayén, ‘Inggaw-a an nato Aggama ta éméyà umarah manò.’ Ekat ano Aggaméén, ‘Okay.’ Cha ano éméy tot-owah Selay way chan ù-ùmun te ekatna anoh hamhamanéén, umissaà tot-owah manò ad uwan.’ Angkay yachi ano way na-aw-awni, namparok ano tot-owa hen anchi manò ah apichang. Yachi ano yag anat èngaw Aggama way mangaleyén, ‘Annayan ah Selay way umara ah manò.’ Angkay yachi ano ginumhad ah Gumiyaw yag innilanah Selay way chana etagtag hen anchi manò.
Finlahana anoh Selay wat ne-elpot hen iposna. Empég-anan ano Selay hen anchi manò te lommayaw anon lennawana ah égyatna. Wat kaman anogu hen anchi manò way empég-anan Selay. Ommaningarngar ano ah Selay way térén, kaskasen te ammag nekoyayos hen lanoknah manò, wat angkay ano yachi way namfangad an Aggama, ginutlomana hen anchi chuway pà-ang Aggama. Ekatna anowén, Masémno te payat chillu ta inno etochar haén. Wachaat chi issatah manò non-a achi cha omentochar.
Angkay ano yachi émméychad Ka-ag, Wat angkay inumchahcha hen anchi fùnagan, ekat anogu Selay an Aggaméén, ‘Hahadchénà an nato ta éméyà umarah manò. Achim agé cha itudtuchu haén.’ Ekat anogu Aggaméén, ‘Okay.’ Yachi ano yag émméy tot-owah Selay. Ammag cha mifurah ano ah Selay te ammag pararo way térén chi lanokna ah manò wat ammag cha-an ano mahen-awniyan yag namparok hen anchi manò ah apichang. Nan-ongaw anogu ah Aggama. Ekatna anoguwén, ‘Annayan ah Selay way umarah manò.’ Inighad ano Usok hen anchi sabfatna yag innilana ah Selay way chana iyawid anchi manò. Senay-angna ano yag nèna hen anchi ipos Selay wat naporhan. Empég-anan ano Selay hen anchi manò way entatangngarna yag pagtopagto hen anchi papayaw way pitchar-ém hen faréy cha Usok. Inunud ano Usok ngém ammag maid innilana ah émméyan Selay te nantaro hen anchi topeng. Angkay ano inilan Selay way lommayaw ah Usok, fummùnag ya ammag pararo ano hen anchi aningarngarna an Aggama te chan hayanghang ano way térén hen iposna way naporhan. Émméy ano an Aggama yag ginotlomana hen opat way gummetna. Ekat ano Aggaméén, ‘Nokay hen icharan-o no?’ Masemno te an-ag natodchar. Ilamngén hen antoy ipos-owat napotchan.’ way ekat ano Selay. Ekat ano Aggaméén, ‘Mapotchan kay chilluy ipos way ammag cha mangaka-akaw ah manò.’ Pararo ano hen anchi aningarngar Selay wat laychéna way mangissa an Aggama. Angkay ano ilan Aggama way issana hiya, ommorob iggaw ak-akettoyay orob ya chana ano masémaséman ah Selay way mangaliyén, Yaha chillu hen churasan hen ammag hen manò hen i-illan.’ Pararo ano hen aningarngar Selay wat anna ano ammag cha pachapachasén way manlò hen anchi orob way émméyan Aggama ngém maid mabalin te ak-akettoy hen anchi orob hen anchi topeng hen pedchor hen payaw way ommorofan Aggama. Ammag nappég ano ah Selay way mamanned ah fumùnagan Aggama ta issana yag achiyat chillu fùnag ah Aggama te ammuna way wacha ah Selay.
Yachi ano hen laprapona way issan hen Selay hen Aggama te ad namenghan ano achi issan hen Selay hen Aggama.
