Hen Kommawasan hen Hen-ahawa
(Tekla Fangonon)
Cha Juan anon Marya, hen-ahawacha. Hen-algawan ano ekat Marya an ahawanéén, ‘Anto hen pesetas ta in-a elao ah files te maid issata ah madhém.’ ‘Okay’, way ekat ano Juan. Émméy ano tot-owah tencha-an yag lommaoh files ngém ancha ano toro hen nelàwan anchi pelakna.
Angkay hommàyat, ekat ano Maryaén, ‘Pakay éméy aran hen annay ancha toro way files? Achi pay ammag maoke hen iha an chita te maid agwan hen awan hen iha.? Ad uwan, aw'à ngarud hen chuwa ta hea hen ihà-an hen awana.’ way ekat ano Marya. Ah Juan, achina agé laychén te hen laychénaat hiya hen mangen-awa hen chuwa. Ekatna anowén, 0o a, ngém haén hen i nangara.’ ‘Oo, a, ngém haén agé hen nempa-ara.’ way ekat agé Marya. Ammag maid ano manguya an chicha.
‘No yaha’ way ekat ano Juan, ‘ayé ta màchangta ah hinnih-a yag pétnénta hen annay iha.’ ‘Oo, ngém awà hen iposna.’ way ekat ano Marya. Ah Juan, iposna agé hen laychéna. Ammag maid agé manguya ah iha.
Ommanongohna yag anchag chan songel way chuwa. Yachi yachi yag chacha mahéyaman te gawan chi lafi. Yag ekat ano Maryaén, ‘No achia ay manguya, ehàfata ngarud ta inta masséy. Anta an ilanha no ah wakas.’ Wat incha tot-owa enhàfa.
Angkay pommaway, incha ilan yag anggay hen tongarna ah wacha te inissan hen ang-angaw. Ekat ano Maryéén, ‘IIam ngén, unninaat lawa no an nanguya hen iha ta iggayta komawas.’ Ekat anogu Juanén, ‘Umpay, unnina tot-owa non anà nanguya ta uray hea hen nangen-awa hen chuwa.’ Chacha anon fafawi ngém looh nalpas.
Yachi hen laprapona ya man-aheinnuyacha way chuwa wat maid kasen kommawasancha.
