Languages

Ad Losoob

Ad Losoob

Ad namenamenghan ano, wacha hen ihay mad-an way fummafabréy ad Losoob. Hiyatoy mad-an, achi masséy hen lafi ya hen ag-agaw, ta achina ano ilan hen matéyan hen a-anàna. Chuwacha hen a-anàna way pahig larae yag enekkatcha yag natéy ah amacha. Ah inacha yanggay hen wacha. Hen antoy inacha, laychéna way achicha matéy hen antoy chuway anànay enekkat, te maid manar-on an hiya te cha marakay. Hen afurot hen tatagu ad namenghan, no masséycha, ta in-inpéncha hen lawengay in-inép, matéy hen anàcha. Yato hen achi masséyan hen anchi mad-an, ta achina ilan hen atéyan anchichay a-anàna. Yag mag hen-argawan ano, i nanggégga-ay hen anchi chuway ungunga, yag hen hiyachi agé, lummigwatcha hen eNgawngaw way i mangayaw yag inchahancha antoy chuway a-anà anchi mad-an, anchaat aran chicha. Hiniwatcha chicha way chuwa.

Angkay yachi, inchahan mad-an anchichay a-anàna way loohcha natéy, te inaran hen eNgawngaw hen urucha. Lommaweng way térén hen hamhamàna, te natéycha hen antoy chuway anàna. Yachi yag ammag amchan hen aningarngarna yag annaat aran hen faligana way fallang yag inligwatna way i mangengkeng ad Alen. Cha anon kengkekengkeng hen yachiy ag-agaw ya hen nafigat. Angkay cha mamatò ano, ummale hen anchi Amoraga way kenengkengana. Annaat aran hen faligana yag enhapratna hen anchi Amoraga. Natéy hen anchi Amoraga, annaat ano aranat éméy ad Ngawngaw. Cha ano madhém hen inumchahana ad Ngawngaw. Netongpo agé yag hiyachi hen nampaparanosan hen anchichay eNgawngaw way nangara hen a-anàna. Ekat ano anchichay ungungéén, “Pasag yag an-aat umchah way mad-an, te annay nadhém wat narpas angkay hen paranosni.” Ekat anonchi mad-anén, “Fummigatà way lummigwat ah faréyni, ngém anà achi makacharan, esonga egad ad uwan yag anà-at umchah ahto.” Yachi ano way nadhém, ekat ano hen anchichay tatagu way fummabréy ad Ngawngawén, “Hénggéptaaw ah faréy ta intaaw man-anichu te nadhém.” Ekat ano hen anchi mad-anén, “Tàén ud-ay ahto chara yag ininggawà, wat uminyaleayu ah ellén ya apoy ta man-apoyà.” Ummidchatcha anoh apoy, wat nan-apoy ah chara. Angkay ano anchi lafi way nasséycha amin hen tatagu, annaat ano aran hen anchi Amoraga way pinchitna, yag annaat etongo yag lommayaw way émméy hen anchi tongtongetongna ad Fullayaw. Inughongana anod Ngawngaw yag angkay ano cha pomaway, ginumhadcha hen chuway ungunga yag incha ano tummùchu iggaw nan-apoyan mad-an. Ekatcha anowén, “Ané, hen nan-apoyan mad-an.” Yag chacha eh-ehwarén hen anchi uheng hen nan-apoyan mad-an. Yachi yag ammag natoad hen anchi chuway ungunga yag natéycha. Gumhadcha hen chinàcha-ar anchichay ungunga way i mangara hen anchichay a-anàcha way natéy, yag natéycha agé. Tachunnachi yag enlapocha way matéy amin anchichay tatagu ad Ngawngaw.

I-illan ano hen anchi mad-an anchi Amoraga way kaman paat awitan way chan at-atton hen anchi tabfongan hen fafaréy ad Ngawngaw. Yachi ano wat natéycha amin hen umili ad Ngawngaw way maid nehàfa ah uray ihà-an. Laylayad anoh mad-an, te natéycha amin hen eNgawngaw way namchit hen a-anàna. Nanalep ano gapoh laylayadna way mangila hen eNgawngaw way cha matéy. Yag nàna agé hiya hen fito wat natéy agé. Yag ad uwan wacha hen awayan way tummufu iggaw hen fito way enhohor-od mad-an hen nàchagana hen anchi fito.

Anggaychi!